C.Lalawmpuia's Blog

(Maawma ninhlei na hmun)

Skip to: Content | Sidebar | Footer

Every battle is won before it is even fought (Thawh khatna)

11 May, 2011 (13:06) | Bulls and Bears | By: admin

 Stock market awmzia hi internet lamah mithiam tam takin Lusei tawngin rawn sawifiah nual thin mahse ENGTIA TIH TUR NGE? Tih lam hi Lusei tawnga chhiar tur a la awm tlat lo mai a, hemi vang hian Mizo te hi Chiahpuam atang tawh khan bum kan la tawk fo mai, Stock market awmzia la hre miah lo tan leh Stock market trading han luh chilh chhin duh tan pawh engtia hma lak tur nge tih ringawt pawh hi a bangbo theih khawp mai. Trading hi kan chemkal na tur lam a nih leh nih loh hre tur tak ngial pawh in thuziak emaw inkaihhruai na kan nei tlat lo a tin ni e. Stock market investment chung chang a beginner guide lehkhabu mi tam tak ziah pawh hi hriat thiam a la har cheu. Chumai bakah Lusei tawnga hetiang lam pang a thuziak hi a la awm miau si loh avangin  in sit tak chungin, hriat thiam awlsam thei  ber turin ka rawn thai lang ve ta chauh mai a ni e. He thuziak hi Trading Tutorial emaw stock market atanga billionaire na emaw a ngaih miah loh tur a nia, Mizo pa Tapchhak ti ti a inhrilhfiah na ang lek ah ngaih tur, a nih loh pawhin mi tamtak lehkhabu “Beginner guide” an ziah hriat awl leh zual na anga ngaih chauh tur a ni e. “`Stock Investing for dummies” FOR DUMMIES ang velah ngaih tur a ni. A leh lam zawng ve thung chuan hetiang ang taka ziahna hi internet ah pawh hmuh tur a vang deuh mai thei, a chhan chu Trader ho hian midang an hrilh ngai meuh lo. An sawi chhuah pawhin a man a tlawm mawh viau. Mizo zingah hian nakin ah chuan hnam dang angin Financial/Capital market trader (Day/Intraday & Swing Trader) hi kan la awm teuh ka beisei tlat a ni.

Khawvel in a stock market a buaipui zia hi chu sawi nawn kher pawh a ngai lo ang, mitamtak lahin Billionaire na emaw an ti thul, a then lah in mihausa tawn taw ho luhchilh chauh tur ah te an lo ngai bawk, a dik na chen pawh a awm ang. Warren Buffet, George Soros a te leh Rakesh Jhunjhunwala te ho pawh in an hausak phah reng bawk a. Amaherawhchu mi maktaduai tel tak meuh meuh in an buaipui ni si, ngatinge stock market vanga billionaire an sawi te hi an va tlem leh lawi si ve! Stock market vanga billionaire tlem te ni lo ho zawng, a nuaih tel tam zawk ho hi an cha vek a ni bik si lova, engtin nge an tih thin?  Khawvel in a hriat tham ni si lova hetiang a Stock market ah Trading buaipui hi a tam zawk an ni tlat! Enge ni a awmzia ni ta ang le? Heng ho hi trader hausa tawn taw an ni miah lo! Heng ho hian an buaipui na chhan ber chu hei vang hi a lo nia lawm. An sum neih zat mil chiah khan an luh pui a, khami kha an lo ti pung thin alawm. Entirnan: Trader tan chuan Rs 1000 hi thla 3-4 chhungin, entry signal awm dan a zirin 20%  emaw a aia tam te in an lo ti pung thin, Strategy hman a zirin a then in Rs 10000 hi thla khatah 2-8% vel te pawhin an ti pung bawk. Chutiang bawk in thla 8-12 chhungin Rs 10000 hi Rs 20000 ah an ti  pung mai thin (hei hi thla tina pung tihna a ni lo a nia, entry signal awm chauh in).  Hetiang a stock market or Financial market dang Forex, Commodities, Futures, Option, CFD, ETF etc a trading thin ho hi Trader te chu an ni. Hriat tur pakhat chu hetiang a an tih pun theih lai hian Rs 1000 (Cheng sangkhat) hi eng ang a thiam nal pawh in Financial market ah hian hun rei lo te chhung kum 1 or 2 velah  tam tham tak (eg Crore tel) ah a ti pung thei lo hul hual tih kha hriat reng a tha a nia. Trader tam zawk in an tum ber chu hausak hluai lam ni lovin, mahni sum neih chin ang zat chiah kha tih pun an tum thin, trader tawngkam takin “Consistance Income”  neih nan a hman kha an tum ber a chu a ni. A awmzia chu Mizo in a kan zawn ber; rei lote chhunga hausak thut na a ni miah lo tih na a nih chu. Trader ho hian an sum neih chin chiah in an trade a, chutah chuan sum lu or Trading capital ngah deuh in a pung an la hnem deuh va, a ngah lo deuh in a pung an la tlem ve leh deuh mai chauh a ni e. Trading capital or sum lu ngah deuh ho tih punna 20% leh a ngah lo deuh tih punna 20% kha a in zat thei ta lo thin a ni. 20% theuh theuh kha percentage in ang mahse sum lu a in an miau loh chuan a in zat thei lo. Rs 1000 a Fixed deposit leh Rs 50000 a Fixed deposit kha a punna percentage in ang mahse a punna zat a in ang thei tawh lo ang deuh hi a ni ber e. Hetiang hian a pung thei ngei a ni tih hriat ni mahse trading hi chuti mai a thil awlsam a ni hauh lo tih hriat erawh a tha. Chiahpuam Strategy dik tak a tawngpawng luh chi a ni miah lo tih erawh hriat reng tur.     

A thupui “Every battle is won before it is even fought” hi kum 2500 hma lam daih tawh a Chinese military analyst, Sun Tzu a lehkhabu ziah “The Art of War” ah chuan he thu hi a lo ziak daih tawh a ni. Indona ah Strategy leh Planning pawimawh zia a sawi chhuah na a ni. Tunthlengin Capital market Trader ho zingah he thu hi a rawn lar chho ta em em mai a, a chhan chu Trading hi eng dang ni lovin Battle between Bulls/Buyer and Bears/Seller or Buyer leh Seller indona(in lei leh in hralh tawnna) a nih vang chauh a ni. A awmzia bera chu “Indona hmun ah ral do tura kal dawn reng reng in, tawngpawng lut lo in analysis neih phawt tur a nia, chumi hnu ah decision leh planning siam a, strategy nen luh chilh chauh tur a ni” a tihna a ni e. Chhiar chhunzawm duh tan a hnuai ah khuan a click theih e.             

http://en.wikipedia.org/wiki/The_Art_of_War             

http://en.wikipedia.org/wiki/Sun_Tzu          

Trader ho hi chi hrang hrang in then an ni a: Scalper, Day/Intraday/Momentum Trader, Swing Trader, Long term investor or Position Trader.             

 Scalper ho chuan rei lo te chhung chauh market hawn laiin position an hawng thin, a awmzia chu zing dar 9:00 AM – 3:30 PM chhung stock market a lo in hawng ta a, hemi chhung hian signal an hmuh tam dan a zirin vawi engemaw zah rei lo te te, 1-15 minutes chhung position an hawng zeuh zeuh ta thin a ni. (Open Position tih hi chu eng company pawh an stock hi lei ni ta se, a tlem emaw a tam emaw share an neih chhung/share holder an nih chhung sawina mai kha a ni. Hriat awlsam nan: Mutual Fund ah investment lo ti ta ila, redeem/withdraw hma kha chuan Open position a ni ve mai.) Scalp hian mit chak leh chet ran te pawh a ngai, market timing dik a ngai em em a ni. Full time trader ho hian scalping hi an hmang thin tlangpui, mahse a tam zawk trading strategy rinrawl ber chu a ni hran lem lo. Scalping hi peih rei tur chuan hrisel tel a ngai lutuk tih hriat a tha a nia. Kar 2 chhung vel nitin market session a scalp reng peih tur chuan luhai neih loh te pawh a ngai a ni. Scalping chungchang ah hian in hnial na tam tak a awm thei a. 24 hour Forex market ah hian scalping hi a theih loh ti a ngai tu hi an tha hnem zawk tlat mai! Trader ka mi rin tak tak ho pawh hian 24 hours Forex market ah hian scalping hi a theih loh an ti tlat! Heta theih loh an tih hi vawi hnih khat lek lek a scalp ni lovin, kum engemaw zat scalp hnu ah hian a hlawk/profitable lo an tihna ber zawk a ni. “Stock market scalper ho pawh hian Forex market ah hian an scalp hlawhtling hlei thei lo a, Stock market ah erawh chuan Scalping chu trader a zirin leh peih dan a zirin a hman tlak tho a ni” an ti. Hei hi chu chhiar tu leh trader ngaih danah in nghat mai teh se. Scalper bula thut chuan market ah an trade tih pawh a hriat loh, “Computer game khel hi an ang zawk” an ti! Market session a in hawng chiah a mouse hi an click nghal zawt zawt a, Shooter game khelh ang maiin Mouse click hi a ri nghal zawih zawih zel! An ti thin a ni.             

 Day/Intraday/Momentum Trader: An ni vethung hi chu scalper/ aiin position an hawng rei deuh hlek, ni khat a awh thin. 9:00 AM ah market lo in hawng ta se, signal hmuh dan a zirin nikhat ah 1-3 hours chhung te position an hawng thin a ni. Mahse market in close rual in an position hawn or Share lei ho kha an close leh vek thin. Professional Day trader ho chuan computer hi a tlem berah monitor pa 2 emaw a aia tam an in chhawp thin. A then phei chuan monitor 8, 16 hmang te pawh an awm. Day trader ho hian Computer hardware technology nVidia SLI leh ATI CrossfireX hi an hmang nasa thin hle. Multi monitor hmang theuh theuh Gamer ai chuan tlem in an hmang tangkai deuh zawk a va ni mai awm em! Day trader ho hi a tlang pui thu in Full time trader an ni thin. Hnadang thawk miah lova trading hi eizawnnan a hmang ho hi Day trader an ni tlang pui. A chhan ber a chu nitin a market hawn laiin computer bula lo thut chilh ve a ngai thin a, hei hi hnadang thawk tan hetianga hun pek hi a remchang lo thin a ni. Scalper, Momentum/ Day trader te hian Stop Loss hi an ngai pawimawh zual bik em em a ni. Stop Loss awmzia hi a hnuaiah rawn tar lan a ni e.             

             Hemi ziah lai hian India ah chuan Wall Street lama Day Trading an tih ang tak tak service pe thei  broker hi tunah chuan ka la hmu chiah lo. Day Trading dik tak ah chuan Trader in Desktop Computer monitor pa 2 atanga pa 4 tal an hmang thin a, Trading terminal atang khan an duh company te stock price kha Candlestick chart ah an thlir a, chart atang  khan an click a, an BUY leh SELL nghal mai thin. Hetiang anga Day trading ve tur chuan Broker lamin Trading Platform/Terminal tha tawk an client te hnenah an pe phawt thin a, chu Trading Platform/Terminal chuan Multi monitor a support ngei tur a ni. India a kan hmuh theih tam zawk Demat account ah hi chuan Live Candlestick chart chu sawi loh Charting software tha pangai tak ngial pawh hi an la pe tel lo! An trading terminal pek tam zawk hi JAVA based Terminal a la ni hlawm deuh veka , a tang (hang) duh em em mai leh nghal, Strong entry signal hmuh chang pawhin Trading terminal ber a “hang” tlat chuan tih vak ngaihna a awm meuh lo. Chuvangin India stock market a Day trading dawn tak tak chuan buaithlak na tam tak a la awm, technologically in kan la hnufum vang a ni ber. Heng hi Day Trading computer chu a ni e. www.tradingcomputersystem.com             

 Swing Trader: Full time trader ni lem lo tan chuan hetiang hi an tam deuh ber, a chhan ber chu hnadang thawk pah tan chuan a remchang ber ani. Nitin nileng a market session laia computer hma a lo thut chilh ve reng tur khan hna dang thawh lai nei tan chuan hun in a daih lo thin. Swing trader ho chuan thla 3-8 chhung te position an hawng thin a ni. Swing trader ho hian signal hi an nghak rei thin khawp mai, a chang chuan kum chanve dawn lai te pawh an nghak mai thin, chutiang bawkin position an hawn pawh in kum chan ve dawn te position an hawng mai thin. Heng ho hi Long Term investor ti a sawi an la ni lo a, SHORT TERM ti a sawi a pawh a ni chuang lo, MEDIUM TERM a ni mah zawk a mahse Medium term trader ti pawhin an sawi lo, heng ho hi Swing Trader an ni.  Hetiang Swing trading hi kan Zo zia, Company investor/Position trader ho anga kum pui linglet a nghah veng veng thei lem lo tan chuan a fuh ber a ni.             

 Position Trader/ Longterm investor: An ni ho chu kum tam fe chhung position an hawng thin. Trader dang ho angin short term atan an lei mai mai lova, kum engemaw zah chhung position an hawng mai thin a ni. Chutiang bawkin Position an hawn dawn emaw an BUY dawn pawhin hun rei tak chhung an nghak mai thin. Mahse hetiang ang ho hi chu an sum hrawm a na thei hlawm khawp mai. Company stock vawi khat an lei hian Warren Buffet te chuan $US billion telin an lei mai a, Big bull of Indian stock market Rakesh Jhunjhunwala te chuan a crore bi in an lei mai thin. Hetiang big player ho tan hian Scalp, Day, Intraday leh Swing trading strategy lo hman kha a fuh ber lo, hun awl khawh ral nan emaw chuan an lo hmang mai thei bawk.               

 Hriat tur pakhat chu Short term ni chiah si lo Long term ti a sawi tur pawh ni chuang lo tawng pawng Kum 10 vel lo tinzawn ve ringawt kha 100% in a him in a pung tha tiin a sawi theih ngawt loh, eg Dt 2 Dec 2010 ah lo invest tan ta i la, Fixed Deposit anga kum 10 hnu Dt 2 Dec 2020 kan lo tawngpawng tinzawn ve ringawt kha a fuh ber lo. A hnu kum 10 a lo thlen ni tak khan thil engpawh a thleng thut thei, Nibiru za rual in khawvel a rawn hem zawt zawt lo ang tih tunge hre lawk? Nibiru pakhat ah pawh kan buai tawh hi! (Nibiru hi a ziak tu hian a awih tihna a ni kher lo). Awmze dang leh, Kum 10 lo tin zawn a invest khan Kum 9 na ah a pung tha viau tawh thei, mahse kum 10 naah tak khan kum 3 dang zet awh turin Stock market crash/ Bear Market/Downtrend rawn nita daih sela engtin nge niang? Chuvangin Bank Fixed Deposit dah anga kum bi thliah a dah chi a ni lo tihna a ni ber. Trader ho in Hun bi (Time) an chhut dan chu a dang daih a nia, an ni chhut dan chu Time Frame tiin an sawi thin. Time Frame hi a kar a zau poh leh a rin tlak a ngaih a ni, chumi awm zia chu a rei poh leh Entry leh Exit signal kha a rintlak tihna a nia, mi tam takin kan rindan “a rei apiang a pung tha/him” tih lam a ni lo. Trader ho thupui pakhat chu BUY LOW SELL HIGH tih a ni. Hemi awm zia chu BUY na tur lai Entry Price kha LOW lai chan a, SELL dawnah Price HIGH lai chan leh tur tihna a ni. Hei hi Timeframe hniam Scalper leh Day trader ho hman 1 Minute/5Minute/30 Minute/1 Hour/4 Hour Time Frame ah chuan chuan Entry leh Exit signal in LOW leh HIGH hi a rawn ti lang ngun em em mai a, a lo dik vek ta thin lo va, hemi vang hian Stop Loss nena ven a ngaih phah reng thin ani, a awmzia chu Timeframe hniam ah chuan False entry/exit signal a tam tihna a nih chu. Hemi vang hian Short term trading hi a risky an tih phah na chhan pawh a ni e, heta short term an tih tak a hi Scalping leh Day Trading an tihna ber a ni e. Chutiang bawkin Swing Trader ho time frame hmanah chuan Entry/Exit signal hi a rawn lang har deuh hlek a, mahse a rawn lan chhun ah chuan a dik ta viau mai, mahse 100% in a la dik ta chuang lo a ni. Position Trader ho chuan an timeframe hman a rei tawh avangin Entry leh Exit signal hi a rawn lang mai mai lo, mahse a lan chhun ah chuan a rintlak tawh viau tihna a ni. Hetah hian Timeframe hman dan chu ziah lan a ni e. Click here             

 Position Trader/Company investor ho chuan Dividend dawn hi an tinzawn tel bawk thin a, entirnan India company tha tak (Fundamentally strong company) ah hian a nuaih tel tak meuh meuh in share nei ta se, Company ho inhralh that leh Quarter ending ah te hian Dividend an pe chhuak ta thin a, Share nuaih tel nei tan chuan Dividend kha Rs 7 chauh pawh ni se, vawikhat dividend pek chhuah ah Mercedes C class man te chu a daih zan zel a, chutah hun a lo rei deuhah an share man kha a rawn sang chho zel bawk si nen, hetia an share neih zat atanga Dividend an dawn zeuh zeuh theih chuan Billionaire investor ho tan chuan long term a invest hi a hlu thlawt a ni, bakah India Company tha (Fundamentally strong company) ho hi a sawi uar deuh phei chuan “khawvel awmchhung chuan an awm tawh ang” te an ti hial a ni. Company Investor/Position Trader tan chuan Dividend ringawt pawh hi ei a tling tihna a ni ber. Mahse hetiang an tih dan hi Rs 2000 velin Company stock hi lei ve ni ta se engzat nge Dividend chu an hmuh thin ang le? Hei lem: Naia Sawmhnih (20 paise) Dividend dawnna             

Click on Pic to enlarge

 

Heng trader chi hran hran te hi a tha ber sawi tur an awm chuang lo va, Day trading a tha ber emaw, Swing a tha ber ti in an sawi meuh lo a chhan chu mahni thiam/nuam tih dan leh hun pek theih dan leh Sum neih zat (Trading Capital) ah a in nghah ber vang zawk a ni e. Khawvela chawhmeh tui ber hi sawithiam a har teh mai a nia. Chuvangin vawi te khat pawh Day trading , Swing trading emaw Position Trading la ti chhin miah lo hian midang bulah Position trading or “Long Term a hlawk” lo tawngpawng tih leh rikngawt hi a fuh ber lo, a pawimawh lai ber “when to buy, when to sell” a awm a ni tih hi hriat a pawimawh.        

Money management: Stock market ah hian stock 1 unit hi company a zirin Rs 3-1500 te a lo ni a, hei hi mahni sum neih atanga chhut in an lei ngam zat kha an lei mai thin a ni. Hetianga chhut hi Money management ti a sawi a ni.Trader chuan market a luh chilh dawn reng rengin a hmasa berah Money management atangin an tan thin, chumi awm zia chu, sum neih zawng zawng kha Rs 1 Lac lo nita se, ta tang chuan stock market ah 10% emaw a aia tlem bakin an luh chilh ngai lo a ni. Forex anih chuan 3% aia tamin an lut ngai lo tluk a ni, a chhan chu a volatile nasat bik vang a ni. Rs 1 Lac atanga 10% chu Rs 10000 a lo ni ta a, hetiang chiah hian Rs 10000 (Cheng singkhat) nei chuan money management hmangin 10% emaw a aia tlem in an risk mai thin. Rs 10000 atanga 10%  risk  na tur zat chu Rs 1000 a ni leh mai. Rs 10000 (Cheng singkhat) zat chiah hian company pa khat stock lei nan a hmang vek lovin Rs 10000 hi company hrang hrang stock lei kual nan an hmang ta thin a ni, hei hi Diversified portfolio a ni. Eg Rs 1 Lac atanga Money management hmanga chhut a 10% chu hetiang deuh hian stock lei nan an semrual thin:           

Hero Honda ah share 2 x Rs 500       = Rs  1000
Maruti ah share 1  x Rs 1000         = Rs  1000
HDFC bank ah Share 2 x Rs 500        = Rs  1000
Reliance capital Share  2  x Rs 500  = Rs  1000
Sesa Goa Share 1  x Rs 500           = Rs   500
Titan Industries Share  1 x Rs 500   = Rs   500
Unitech Share  10 x Rs 200           = Rs  2000
Tata Motors Share 2 x Rs 1000        = Rs  2000
Ranbaxy Share 2  x Rs 500            = Rs  1000
                     Total             Rs 10000

(Heng Company stock price hi entirna chauh a ni e)            

 Khatiang khan industry sector hran hran ah an Trading na tura sum an dah hran a kha an sem kual leh thin a ni. Hetiang hian diversified portfolio ni turin company hran hran stock kha an lei kual thin ani. Mahse hei hi tawngpawng semkual ringawt loin Fundamental a company tha leh Price Chart ah ENTRY SIGNAL an hmuhna bik company ah chauh an lei thin. Achhanchu BSE leh NSE a in registered companies hi za chuang fe an awm tih hriat a tha, heng ho stock price hi engtik lai pawhin strong entry signal a awm vek reng kher lo a ni. Trading hi a thiam apiang in Money leh Risk management hi an ngaipawimawh tih hriat reng hi a tha. Money management hi Trading kher lo ah pawh Chiahpuam ah pawh khan lo hman nita se, a tuar tu tam tak khan khatiang ang em em khan an tuar lo ang. Mahni inhmun hralh a, thenawm pa leh chhungte zawng zawng sum neih sa khawnkhawm a Chiahpuam a vawm luh te phei kha chu Money management atanga thlir chuan a in per san nasa lutuk tlat.            

Money management chung chang atana hriat tur pakhat chu Market a Risk luh pui ngam emaw va trade ngam na zat hi 10% chiah chiah kher a chhut a ngai chuang lo a  mahni in sum neih zawng zawng atang khan engzat nge risk lak ngam na zat kha chhut mai zawk tur a ni, 1% chauh pawh a ni thei. Rilru a riah tir tur pakhat chu a hlawkna lampang aiin lo Loss PALH tur nita se engzat chin ah nge Loss ngam na zat kha rilru ah in rin lawk tur a ni. Market a ni tih hriat reng a tha, Bull market awm ngei ngei tura ngaih laiin Bear market a awm thut thei reng a ni. Chuvangin Trade duh bawk si mahse risk tam ngam chuan bawk si loh chuan 1% lek pawha trade mai kha a fuh mai. Mi tam takin hausak thutna emaw tiin neih zawng zawng nen an zuang lut a, rin loh lam zawngin market a kal ta thut sia! Hlawk lam aiin an hek ta zawk thin a ni. Hetiang ho hi stock market a loss hnem ber thin an ni fo, a hnu a stock market sawi risky em em tu leh Gambling anga sawi tu te hi an ni duh viau bawk. Trading hi Gambling anga sawi ho hian a Gambling pawh hi a awmzia dik tak an hre ngai lo, Gambling (Martingale system) hrechiang duh tan hetah hian a click theih e http://en.wikipedia.org/wiki/Martingale_(betting_system) . Trading chu sumdawnna pangai kan tih nen hian in an deuhna an neih zawk chu CALCULATED RISK an ni ve ve a ni. “Money management, Strategy leh Price Analysis hi stool ke pathum ang a ni e” an ti, pakhat a tliah chuan a thut tlak loh! A tlu mai zel.            

Trading hi a HLAUHAWM LOH:             

Professional Trader pakhat chuan heti hian a sawi “Market Trading hi a risky loh, mahse a risky an tihna chhan chu mahni mihring mihrinna a bet tlat GREED (duhamna) vang chauh zawk a ni” a tia, a dik khawp in ka hria. Mihring nunphung a bet tlat GREED hi control thiam loh chuan market ah chuan a risky tak meuh meuh a ni.            

Chhura hnahthel sen hlauh ang mai a Trading a nih tawh phawt chuan tih dui ringawt pawh hi a dik bik chuang miah lo,Stock Trading hi fimkhur a ngaih zia Paragraph chung lamah khian ziah ni mah se, a leh lam zawng in han thlir ve leh thung i la. Stock market ah hian company stock price Rs 30 (Cheng sawmthum) man emaw a ai a tlem hi a tam lutuk, ngatinge trading anih vanga rilru ah Rs 5 Lacs, 10 Lacs, 50 lacs or 1 crore emaw a aia tam rilru ah a lo lan rikngawt na chhan pawh hi kan ralrin nasat lutuk vang a ni. He thuziak lai hian NSE ah Krishna Engineering Works (Krishnaeng) ho stock price hi Rs 3.80 chauh a ni (Cheng Thum leh naia sawmriat). Krishna Engineering Works  ho stock 1 unit lei tur hian Multi billionaire nih a ngaihna chhan ka hre lo reng reng, KRISHENG stock 1 unit @ Rs 3.80 lei vanga Trading hi risk a san tak em em pawh ka hre hek lo. Sum neih chen a in ang lo, mahse Rs 3.80 a company stock lei tu leh a crore tel a stock leitu kha Share holder an ni vek tho. Stock Trader an ni tlang vek, an Trading capital a in tam hleih mai chauh a ni. Rs 3.80 (Cheng thum leh naia sawm riat) loss vang a chhe vek tur kan awm a nih chuan engtik laimahin Trading hi buaipui miah loh tur. A tlem berah 10 Lacs vel neih phawt hnu ah trading hi luhchilh chauh turah kan ngai a nih chuan kan ti sual der ang. Professional trader ho hi a tir ah tumah in tamtak in an luh chilh lo. Rs 10 (Cheng sawm) hi Rs 20 (Cheng Sawmhnih) ah Stock market ah awmze nei a tih pun theih loh chuan engvang tehlul in nge Rs 1 Lac hi Rs 2 lacs ah a pun rikngawt ang? Thil theih a ni lo, a chhan chu Sum ngah lam ni lovin SKILL develop tur a awm zawk a ni. Hriat reng tur chu trading a sum tih pun theihdan a hi mahni thiam (skill) danah a in nghat nasa hle tih hriat tur, SKILL develop tur hian chhiar ringawt a hriat chi a ni lo. Thiamhnang chaw chhuak tur hian zir deuh tak tak erawh chu a ngai , hemi hnu hi chuan ni khat ah market OPEN/CLOSE chan zeuh zeuh a, ENTRY/EXIT signal chan chhuah kha a ni tawh ber. Company stock kan va lei hian Loss ngei ngei tur tihna a ni kher lo. Shareholder/company neitu nih ve na a ni zawk e. Entirnan Rs 1000 in Maruti Suzuki India Limited stock hi BUY ni ta se, Maruti Company ho car hralh chhuah ah khan Naia 5 (5 paisa) bawr vel an car khawi engemaw ber ah khan kan thawh ve zel tihna zawk a ni e. Hriat leh mai mai atana tha bawk chu, trader tam takin Stock market ah chuan “Knowledge” a pawimawh zia an sawi thin ang, heta an sawi tum ber thin a chu General Knowledge anga hriatzauna lam ni lovin tawn chhoh pah a HRIATNA kha a ni thin. School/College kan kal laia exam dawna byheart vak chi ang kha a ni lo, leh Company report ang te, Balance sheet, P&L A/C fiqure lo byheart vak lam pawh a ni chuang lo, heti zawng a kal vak chuan over reading a awm thei tih hriat reng a tha a nia.           

  Loss:             

Trading chungchang ziaktu pakhat chuan a thuziak pakhat Stop Loss hman dan tur a sawifiah na ah chuan a thuhma ah “ I hate stop loss” ti in bul a tan nghal ringawt! A dik reng bawk a, Stop Loss hi a huat thlala awm a ni mahse Trading ah, a bikin Scalping/Day trading ah chuan awm tel ngei ngei tura ngaih a ni “Part of the game” ah an pawm hmiah. Intraday/Swing leh Position trader ho chuan Stop Loss hi an hmang vak lova mahse signal (Price Top leh Bottom) an chang rei peih thung a ni. Scalper/Day trader chuan Market ah an luh hma in Loss lo ngai palh ta se, engzat nge an loss ang tih kha an lo calculate lawk vek thin avangin, an lo chhut lawk bak hi an hlauh ngai lo a ni. Hei hi Calculated Risk a nihna chhan pakhat a ni tel ve bawk. Hriat tur ngai ho hriat tawh hnu ah leh market trend te enthiam hnu ah, Money management leh Risk management nen a tang kawp a, strategy leh plan nen thlap a market ah an zuan luh hnu ah pawh Stop loss hi a la per palh thei tho! Market a ni miau sia. Mahse plan mumal a market a zuan luh a nih tawh thin avangin LOSS pawh awmze nei a ni tawh thin a ni “Every battle is won before it is even fought”. Stop Loss chhut dan awlsam ber chu, mahni phal zat chiah loss kha a ni mai.               

Money management, Analysis (Fundamental & Technical) leh strategy te hman vek tawh hnu ah Stop Loss a lo per palh a nih chuan, kha stop loss kha pawm (accept) tawh mai tur a ni. Loss accept hi thil har lutuk mahse Day Trading kalphung zingah tel ve tlat a ni. Hriat reng tur chu Trader zingah, a bikin Day trader bik ah hian vawikhat mah la loss miah lo anga an in chhal chu an DAW a ni, mahse an winning ratio a tam thin zawk avangin an loss a kha chu an hmulet leh mai thin zawk a ni. Professional tam tak hian loss lo ngai palh ta se, an loss tur zat hi a tirah an bithliah nghal sa vek thin a, a then chuan Company pa khat ah 10% aia tam loss tum miah lo tur te in a tirah an chhut nghal thlap thin.              

Stop loss an chhut dan tlangpui chu hetiang hi a ni e. Mi in a sum neih zawng zawng kha Rs 1 Lac lo ni ta se, money management hmangin 10% chu trade nan lo hmang ta se, tichuan Rs 10000 kha Trading capital a lo nei ta a, hei hi company 10 ah share lei nan Rs 1000 theuhin  an sem kual leh a, chuan company pakhat ah hian 10% emaw a aia tlem ah stop loss chu an dah ta thin a ni. Mumal taka market a luh a nih tawh avangin company pakhat ah stop loss lo per palh ta se, Rs 1000 atanga 10% chu Rs 100 a ni mai. Company hran hran 10 atanga share an lei ah hian Company 3 velah stop loss lo per palh ta se an loss tur zat chu Rs 300 a ni dawn ta tih na a nih chu. Mahse company 7 dangah an profit tho chuan heta stop loss per hi chu an hmulet thei thin tlang pui.                

 Trading hi sumdawnna chikhat ah ngaih hmiah tur a nia. Entirnan Rs 10000 innepnawi dawr in bul lo tan dawn ta i la, dawr bungrua hralh hma hauhin business expenditure tam tak sen ral ngai a awm: Dawr chei na te, electric bill, dawr luahman, bungraw lakna man (Transportation/Shipping charge) leh thildang te. Heng te pawh hi LOSS tho an ni, dawr tan hnu ah dawr bungrua lak zawng zawng hi hralh zawh nghal vek zel a lo ni chuang lo bawk nen. Thla khatah bungraw lak atanga 50% hi hralh ang lo ni ta se, bungraw tangkhang 50% te kha hralh har lutuk chuan LOSS an ni ve thei tho. Hetiang ang hi indirect loss mahse kan palzam tak thin te an ni. Hetiang a Loss pawh hi tawngpawng loss a ni chiah chuang  lo, calculated Loss/risk a ni ve tho mai ang chu. Hetiang ang zawng deuh hian Trading a Loss palh a awm pawhin thlir thiam a tha, mahse Calculated Loss a ni ngei ngei tur a ni.              

Lehkhabu: Financial market lam pang lehkhabu tawngpawng chhiar vak vak hi a tha tho na chungin, over reading te pawh a awm ve thei tho a ni. Mahni in a han dai buak tur tam tak a awm ve a, hemi hi tawnhriat atang tak tak lo chuan a hriat theih loh a ni. In zir tirh dawn ah chuan  Economics emaw Finance lam kaih hnawih lehkhabu chhiar aiin Trader ho ziah lehkhabu hi an rin tlak ber tih hriat a tha. Steve Nison, Bill William, Dr Alexader Elder a ziah te hi a lar zual an nia. Hriat leh tur pakhat chu hetiang ang lehkhabu ziah chhiar chhuah dap pawh ni mahse, nitin market session apianga market awm dan ngaih chan reng peih leh chuan si loh chuan awmzia a awm chuang lo a ni, a awmzia ber chu novel bu chhiar a chhiar chi a ni lo, chhiar leh hriatthiam kha a in rual chho tur a ni. Mizo leh kha zir dan dik takin Company Annual Report a Balance sheet, Profit and Loss account a figure awm te hi a tawnpawng by heart ringawt kha a fuh ber lo, Market chezia kha hriatthiam a pawimawh hle tihna a ni.              

Emotion: Thil pawimawh tak pakhat chhiar atang ringawt a hriat loh chi leh bawk chu Emotion control or Discipline hi a ni. Hei hi Fear and Greed ti in an sawi mai a, control thiam a ngai em em mai a. Tihian sawi fiah leh ta i la, Company XYZ stock hi Rs 100 in 10 unit lei lo ni ta se, kar thum na velah price rally a awm a, tah chuan Company XYZ stock 1 Rs 100 kha Rs 200 (100%) aia sanga ah a rawn pung chho ta hluai mai a, hetah tak hian GREED a rawn awm thin, a pung chhunzawm zel tura ngaih avang leh phur lutuk vangin stock price @ Rs 250 na velah a aia tam share an han lei belh leh sak maia, mahse trader tam zawkin an lo TakeProfit leh tawh si! Stock price @ Rs 250 a lei kha a hnu lawkah Rs 150 ah a rawn tla thla leh daih! Hei hi Market Analysis loh vang leh GREED vanga BUY a ni tawh thin. Chutiang bawk in company XYZ  Stock price kha Rs 100 ah stock 10 unit lei lo ni leh ta se, XYZ stock @ Rs 100 kha a tuk ah Rs 90 ah a rawn tla thla, hemi hi a tlak zel hlauhna “FEAR” vangin loss poh poiti lovin an Positon an close mai thin, mahse hei hi market tla/bear market ni lovin a hnu kar 2 na vel a Rs 90 atang khan Rs 250 ah a chho leh daih, “Pull back” lek a lo ni leh si. SELL lovin position kha lo la hawng hle hle sela a profit ni mai tur. Pull back hi tlan dawna, tan kan han khawh lai vel KHAI O!! Ti a kan tlan tak tak hma sia a chhete kan han hnung tawlh a kan han in sang phek lai vel ang hi ni mai. Hetiang hian FEAR leh GREED hi control thiam angai a, hei hi thil har tak chhiar atanga hriat ngawt theih loh tawn hriat chi a ni. Profesional trader or kum 20 chuang lo trade tawh bulah hian an trade laiin thu ta i la, an loss leh profit lai hi an in control hneh lutuk a, an chezia atangin an Loss nge profit engmah a hriat theih loh thin an ti. A then chuan Discipline Trader ti te pawh in an sawi bawk, hemi vang hian a nia “Trading is a game of Discipline” tih te pawh a an sawi tak na chhan. Discipline atang lo chuan hetiang emotion (Fear leh Greed) nasa taka in thlak thut thut thin hi a control theih loh a ni. Movie vel a an phur lutuk zuang vel hi Movie a ni tih hriat reng tur, Bull or Bear market pawh awm se an phili buai ngai lo.              

Entry leh Exit: Trading ah chuan ENTRY leh EXIT or “When to Pull the trigger” hi a pawimawh lawr lak tih hriat a tha, a har lai ber a ni bawk. Company report leh Financial data chi hrang hrang atangin Company rintlak tak ni a ngaih chu thlan lo nita se, an stock va lei chiah khan a tuk ah stock price leina kha a hma aiin a lo tla hniam leh daih thei, hemi lai tak hi a har lai em em a chu a ni. A then chuan timing the market ti te pawhin an sawi bawk. Stock lei dawn lai tak, Trigger price or mouse click dawn minute, Hour leh Date ah chuan Price Analysis or Technical Analysis hmangin an luh chilh ta thin a ni. Hei hi Positon Trader pawhin Price Analysis hi Support & Resistance en nan an hmang vek tih hriat a tha. Eg SBI bank chu hetia han ngaih mai or rule of thumb atanga han chhut pawh hian an rintlak tih a hriat, Trader in an stock lei dawna hriat tur ang Fundamental Analysis hmanga thlir pawh in Company him/rintlak a ni, an tlu chhe dawn lo tih pawh a chiang mahse SBI stock 1 unit kha Rs 1000 in lei ni ta se, a tuk ah Rs 600 ah a tla leh daih! Ni khat lek ah Rs 400 chu loss der! Ngatinge Company him a ngaih a ni tho sia, an bankrupt emaw an tlukchhiat kan hre bawk si lo!!! Entirna dang leh: Maruti Suzuki Stock 1 unit hi Dt 3 Jan 2000 ah Rs 500 in “Trader A” in lo lei ta se, a kar leh Dt 10 Jan 2000 ah chuan Rs 350 ah a tla daih, mahse hetih lai tak hian “Trader B” chuan Support a zuk tawk zauh tih hria in he lai ah tak hian lo lei ta zauh hman se, a kar thum na Dt 17-jan-2010 ah Rs 800 ah a chho ta daih! Trader A in Maruti Suzuki stock a leina  Rs 500 atanga chhut chuan Rs 800 a thlen in a hlep tur chu Rs 300 chauh a ni, chutihrualin Rs 350 a tlak zeuh laia lo BUY hman tu Trader B chuan Rs 800 a thlen chuan Rs 450 hlep daih ani. Trader B hian Trader A aiin a lei hnuhnung zawk daih mahse a la hlep tha zawk leh nghal! Ti khan Entry leh Exit pawimawh zia chu a mitthla thiam theih deuh em ang chu! (SBI leh Maruti Suzuki stock price leh date khi entirna chauh a ni) . Entry leh Exit pawimawh na hi chhiar ringawt a hriat chi a ni lo, Entry leh Exit lai tak a hi hre tur chuan Skill develop a ngai a chumi tur chuan in practice a ngai a, hun a duh rei bawk a ni. Support and resistance chung chang hi he thuziak ah hian tarlan tawh a ni e Click Here.              

Thawh hnihna ah chuan Trader hoin market an thlir dawn a Analysis an hman lar pahnih Fundamental leh Technical Analysis te, Trading practise dan tur te, Strategy leh Online trading dawna hmalak tan dan tur ziah ka’n tum leh ang.     

Comments

comments

Comments

Comment from omomapa
Time May 11, 2011 at 11:01 pm

Ka chhiar chhuak dap a, ka veng uar uar mai. Ka chhiar nawn leh ang.
A thawh hnihna tur khi ka nghakhlel hle mai.

Pingback from Every Battle is Won before it is even fought (Thawh khatna) | mi(sual).com
Time May 13, 2011 at 12:06 am

[…] Stock market vanga billionaire tlem te ni lo ho zawng, a nuaih tel tam zawk ho hi an cha vek a ni bik si lova, engtin nge an tih thin? Chhiar chhunzawm duh tan heti lamah i phei leh them them ang lu lem click here […]

Comment from lala
Time May 13, 2011 at 7:27 am

A tha hle mai, mahse ka hriatthiam aiin ka hriatthiamloh a tamzawk

Comment from caribou
Time May 13, 2011 at 7:37 am

Market a tlakhniam thut a lungngaia indawm kun ho hian, a hniam lai tak khan lei belh ta se, a fuh phian ka ring. I thuziak hi a tha kher mai. I ziak chipchiarin, hrethiamlo tan pawha thiamna tham khawpin i ziak niin ka hria. Stock market hi chu la luhchilh ve tak tak a chakawm kher mai.

Ka hman veleh i thuziak hi ka chhiar nawn leh ang. Thuziak tha lutuk leh hlu tak mai chhiar atana min rawn hlui avangin ka lawm e.

Comment from cancer
Time May 13, 2011 at 8:51 am

a tha hle mai..indo bangla border trade lam pawh hre zau deuh ang a

Comment from admin
Time May 13, 2011 at 10:54 am

@omomapa: Thawh hnihna pawh rawn post leh dawn nia
@Caribou: Ti lawmawm thin hle mai.
@ lala & Cancer: He blog in rawn tlawh hi a lawmawm hle mai

Comment from funny
Time May 13, 2011 at 2:28 pm

A bengvar thlak hlemai. A sei bawksia nakina chhiar nawn leh ah a page hi ka save mai dawn.

Comment from admin
Time May 13, 2011 at 9:59 pm

@Funny: ziah chhung pawh a rei ve zek, tuna mi hi a chanve ah thuai bung ringawt sei lutuk dawn a

Comment from eL
Time May 16, 2011 at 1:53 pm

tha hle mai..ka var uar mai…tih ve chhin tur nih hi a

Comment from david
Time November 23, 2012 at 9:56 pm

k zon k zon cu hei gei hi ni…lomom hle mai.

Comment from admin
Time November 25, 2012 at 12:39 pm

@David, a lawmawm e, i la rawn tlawh fo dawn nia

Comment from aumawia
Time March 2, 2016 at 3:14 pm

Mizo tawng ngeia ziakah chuan a ngaihnawmin a hlawkthlak khop mai. Stock trading hi tunlai chu ka chhiar ka chhiar ve a, luh ve a chakom hle mai.

Pu admin, live-a in kawm ka chak hle mai.

Comment from aumawia
Time March 2, 2016 at 3:16 pm

Mizo tawng ngeia ziakah chuan chhiar a la manhla ber awm e.

Pu admin, Stock trading hi tunlai chu phak ang tawkin ka zir ve a, live-a inkhawm ka chak hle mai.

Comment from admin
Time August 8, 2016 at 5:13 pm

@Aumawia, teh reng mai, kan la inkawm dawn nia

Write a comment





*

You can add images to your comment by clicking here.